17 декабрь куни Фарғона вилоятидаги “Petrolium” газ-резина заправкасида содир бўлган кучли портлаш юзасидан расмийлар ҳануз жим. Ҳолбуки, бу фожиа ортидан ижтимоий тармоқларда ҳар куни янги ва даҳшатли тафсилотлар тарқалмоқда.
“Бир оила тириклайин ёнган”
Фарғоналик фойдаланувчиларнинг ёзишича, портлаш содир бўлган пайтда автомобиллардан бирида 36 ёшли визажист аёл икки боласи ва бир жияни билан бирга тириклайин ёниб кетган. Ушбу маълумотни Instagram’да ҳам бир неча фойдаланувчилар тасдиқлаган.
Аниқланганига кўра, аёл заправкага ёнилғи қуйиш учун кирган, шу вақтда портлаш рўй берган. Ҳодиса оқибатида у, икки фарзанди ва 18 ёшли қиз жияни ҳалок бўлгани айтилмоқда.
“Икки, уч, тўртта тобут чиқди…”
Тармоқларда тарқалган видеоларни таҳлил қилган фуқароларга кўра, портлашдан кейин бир уйдан икки, уч, ҳатто тўртагача тобут чиққани кўрилган. Фарғоналик Талъат Ҳасанов видеони секинлатиб кўриб, камида 20 кишининг ҳалок бўлганини санаганини ёзган. Шерзод Тиловов эса ўзига яқин манбадан олинган маълумотга таянган ҳолда, қурбонлар сони 20 тадан ортиқ эканини билдирган.
37 ёки 40…? Расмийлар қайда қарайди?
Instagram’даги фаоллардан Лола Умарова қурбонлар сони 37 нафарга етганини ёзган. Бошқалар эса жароҳатланганларнинг бир қисми шифохонада вафот этганини, натижада ҳалок бўлганлар сони 40 нафардан ошиб кетганини маълум қилган.
Энг қизиғи, ушбу даҳшатли фожеага нисбатан расмий идоралар — Фарғона вилояти ҳокимлиги, ИИБ, ФВБ ва бошқа мутасаддилар томонидан ҳануз бирор расмий сўз айтилмади. Улар интернетда тарқалаётган рақамларни на тасдиқлади, на инкор қилди. Савол туғилади: бу сукут розилик белгисими?
8 ёки 9? Рақамлардаги зиддият
17 декабрь куни тарқатилган расмий баёнотда 8 нафар фуқаро шифохонада экани айтилган. Аммо худди шу куни Республика шошилмаси тиббиёт марказининг Фарғона филиали шифокори Давлатбек Орипов 9 нафар жабрланувчи ҳақида гапирди. Бу рақамлар ўртасидаги зиддият ҳам саволларга сабаб бўлмоқда.
Энг катта савол: нега ҳукумат комиссияси тузилмади?
Фарғонадаги портлаш О’збекистондаги энг йирик фалокатлардан бири сифатида баҳоланмоқда. Бундан олдинги шунга ўхшаш фожеаларда — Урганч, Когон, Денов, Жиззах, Сергелидаги портлашларда, ҳатто электр узилишлари пайтида ҳам Президент ёки Бош вазир топшириғи билан ҳукумат комиссиялари тузилган эди.
Бироқ Фарғонада 36 ёшли аёл ва унинг болалари ҳалок бўлгани, юзлаб одам жароҳатлангани, кўплаб уйларга зиён етганига қарамай, бу гал на ҳукумат комиссияси, на очиқ изоҳ бор. Нега?
Портлаган “заправка” нима учун дарҳол бузиб ташланди?
Оддий ҳолларда портлаш содир бўлган жой тергов тугашигача муҳрланиб, ҳимояда сақланади. Аммо бу ҳолатда “Petrolium” заправкаси тергов бошланмасидан аввал бузиб ташланди.
Фарғона вилояти ФВБ бу ишни тадбиркорнинг “ўз хоҳиши” билан бўлгани ва бошқа фаолият билан шуғулланмаслиги билан изоҳлади. Аммо савол туғилади: қонун устуворми ёки тадбиркор хоҳиши?
Жамоатчиликга очиқлик керак!
Мазкур фожеа юзасидан жамоатчиликда шунча савол вужудга келмоқда. Ҳеч бўлмаганда қурбонлар сони, тергов жараёни, сабаблар юзасидан расмий ахборот берилмаса, фейк ва шубҳали маълумотлар тарқалиши, аҳолидаги ишончсизлик кучайиши муқаррар.
Очиқлик – ҳукуматнинг бурчи, жамиятнинг ҳаққидир.
