Европа темирйўл алоқаларида янги саҳифа очилиши кутилмоқда. “Eurostar”компанияси Франкфурт орқали Германия ва Швейсарияни Буюк Британия пойтахти — Лондонга боғловчи бевосита поездлар қатновини йўлга қўймоқчи. Режага кўра, бу лойиҳа 2030 йилларнинг бошларига қадар амалга оширилади.
Темирйўл оператори Франкфурт–Лондон йўналишида йилига камида 2 миллион йўловчи ташиш имкониятини кўрмоқда. Агар поездлар Геневадан ҳам ҳаракатланса, бу кўрсаткич яна бир миллионга ортиши мумкин.
Германиянинг "Deutsche Bahn" компанияси Eurostar билан ҳамкорликни кенгайтиришга тайёрлигини билдирган бўлса-да, янги йўналишни жорий этиш техник, ҳуқуқий ва ташкилий мураккабликлар билан юзлашишини таъкидлади. Сабаблардан бири – станцияларда махсус чегара назорати инфратузилмасини яратиш зарурати.
“Eurostar” 2030 йилгача 50 та янги поезд харид қилиб, йиллик йўловчилар сонини 30 миллионгача етказишни мақсад қилган. 2024 йилда компания 19,5 миллион йўловчи ташиб, 5 фоизлик ўсишга эришганини маълум қилган.
