АҚШдаги антиммигратсион рейдларга қарши норозилик намойишлари фонида федерал ҳукумат Лос-Анжелес шаҳрида миллий гвардия аъзолари сонини икки баробар оширди.
Калифорния штати губернатори Гейвин Нюсомнинг ижтимоий тармоқдаги баёнотига кўра, ҳозирда шаҳарда 4000 нафар миллий гвардиячи сафарбар этилган. Бундан ташқари, яна 700 нафар АҚШ денгиз пиёдалари (морпехлари) шаҳарга жўнатилганини AFP агентлиги хабар бермоқда.
Собиқ президент Дональд Трамп эса, агар намойишлар давом этса, шаҳарга янада кўпроқ федерал кучларни юбориш билан таҳдид қилган. У шунингдек, "юборилган ҳарбийларга нисбатан ҳурматсизлик кўрсатган намойишчиларга нисбатан куч ишлатилиши" мумкинлигини айтиб ўтди.
Норозиликлар давом этаётган бир пайтда CNN телеканали ҳуқуқни муҳофаза қилиш органлари намойишларни бостиришда резина ўқлар ва шовқинли свет эффектли гранаталардан фойдаланаётганини маълум қилди. Кечга яқин ҳуқуқ-тартибот кучлари шаҳар кўчаларини тозалаб, қолган намойишчиларни тарқатишга уринмоқда.
Калифорния губернатори Гейвин Нюсом Трампнинг бу ҳаракатларини кескин қоралаб, уни "антиамерикача" деб баҳолади. Унинг сўзларига кўра, АҚШ денгиз пиёдалари хорижий таҳдидларга қарши курашиш учун мўлжалланган бўлиб, мамлакат ичкарисида ишлатилмаслиги лозим.
"Бу – президент-диктаторнинг тентакона орзусини рўёбга чиқариш йўлидаги ҳаракатдир", – деди Нюсом. Шунингдек, губернатор Трампнинг миллий гвардияни ўз бошқарувига ўтказиш ҳақидаги фармонини ноқонуний деб ҳисоблаб, унга қарши судга мурожаат қилишини маълум қилди.
