Европа Иттифоқи томонидан Россияга қарши қабул қилинган 17-санкциялар пакети доирасида Ўзбекистоннинг Trade Engine System компанияси янги санкциялар рўйхатига киритилди. Бу ҳақда Евроиттифоқнинг расмий сайтида эълон қилинди.
Қайд этилишича, мазкур компания Россия ҳарбий-саноат комплексига кўмаклашишда гумон қилинмоқда. Шу сабабли унга нисбатан икки йўналишда қўлланилиши мумкин бўлган маҳсулот ва технологиялар (яъни, фуқаролик ҳамда ҳарбий мақсадларда фойдаланилиши мумкин бўлган) экспортига қатъий чекловлар жорий этилган.
Янги санкциялар Россиянинг “соя флоти” деб аталувчи 149 та нефть танкерига, шунингдек, Россияни санкцияларни четлаб ўтишда қўллаб-қувватлаганликда гумон қилинаётган учинчи давлатлар компанияларига қарши қаратилган. Улар орасида БАА, Туркия, Сербия ва Вьетнам компаниялари ҳам бор.
Маълумот учун, Trade Engine System компанияси темирйўл, автомобиль, денгиз ва ҳаво транспортида юк ташиш фаолияти билан шуғулланади. Компания 2022 йил июль ойида рўйхатдан ўтган бўлиб, унинг устав капитали 10 миллион сўмни ташкил этади. Таъсисчиси ва директори Носиржон Акбаров.
Эслатиб ўтамиз, Европа Иттифоқининг Россиянинг Украинага тўлиқ босқини бошлаганининг уч йиллиги муносабати билан эълон қилган 16-санкциялар пакетига ҳам Ўзбекистон компанияси киритилганди. Ўшанда механик дастгоҳларнинг улгуржи савдоси билан шуғуллануавчи Uzstanex компанияси ЕИ санкциясига учраган.
