Германия витсе-канцлери ва молия вазири Ларс Клингбайл “G7”давлатларини божхона уруши ва иқтисодий ноаниқликларга чек қўйишга, шунингдек, Украинани янада кучлироқ қўллаб-қувватлашга чақирди. Бу ҳақда у Канадага жўнаб кетишидан олдин журналистларга берган интервьюсида айтиб ўтди.
“Божлар ва ноаниқликлар иқтисодиётимизга босим бермоқда. Бу эса миллионлаб иш ўринлари хавфсизлигини таҳдид остида қолдиради”, — деди Клингбайл Reuters агентлигига.
У Канадада бўлиб ўтадиган “G7” молия вазирлари учрашувида иштирок этади. Мазкур йиғилишда Украина молия вазири Сергей Марченко ҳам қатнашади. Клингбайл ушбу форум доирасида “G7” давлатлари Украинага нисбатан бир ёқадан бош чиқариб, қатъий позицияда туриши зарурлигини таъкидлади.
“Биз адолатли ва барқарор тинчликни таъминлаш учун “G7” доирасида аниқ сигнал беришимиз лозим. Украина бизнинг ёрдамизга таянмоқда”, — дея қўшимча қилди Германия молия вазири.
20–22 май кунлари ўтадиган учрашувда нафақат уруш давомида кўрсатиладиган ёрдам, балки Украина инфратузилмасини урушдан кейинги тиклаш режалари ҳам муҳокама қилинади. Клингбайлнинг таъкидлашича, бу борада хусусий инвестицияларни жалб этиш масаласи ҳам кун тартибига киритилган.
