Украина президенти Владимир Зеленский Россияни урушни давом эттириш мақсадида вақтни чўзаётганликда айблади.
Унинг сўзларига кўра, Россия дипломатик жараёнларни фақат уруш ва босиб олинган ҳудудларни сақлаб қолиш учун ишлатмоқда.
“Асосий нарса — дипломатик ҳаракатлар мувофиқлаштирилган ва реал натижаларга қаратилган бўлиши керак. Афсуски, Россия фақат вақт ютишга уринмоқда, уруш ва босқин эса давом этмоқда”, — деди Зеленский Х (аввалги Twitter) тармоғидаги баёнотида.
Унинг айтишича, Украина ҳозирда халқаро ҳамкорлар билан Россияга нисбатан босимни кучайтириш, уни музокараларда мантиқли ва самарали позицияга қайтариш устида ишламоқда.
“Уруш музокаралар билан якунланиши керак”
Зеленский Россияга очиқ чақириқ йўллаб, ҳар қандай конструктив ва реал таклифлар асосидаги музокараларга тайёрлигини билдирди.
“Украина натижадор музокара шаклларига тайёр. Аммо агар Россия яна ҳақиқий бўлмаган шартлар қўйса ёки жараённи саботаж қилса, бу жиддий оқибатларсиз қолмаслиги керак”, — дея қўшимча қилди у.
Президент бу уруш дипломатик йўл билан тугатилиши кераклигини таъкидлаб, музокаралар фақат адолатли ва халқаро ҳуқуқ доирасида бўлиши кераклигини эслатди.
Украина ҳукумати Ғарб давлатлари билан Россияни янада кўпроқ яккалаш, санкцияларни кучайтириш ва урушни тўхтатишга мажбур қилиш чораларини муҳокама қилмоқда.
