Путин бевосита учрашувдан бош тортса ҳам, Зеленский барибир Туркияга боради.
Украина президенти Владимир Зеленский маъмуриятининг раҳбари Андрей Ермак. Франциянинг Le Monde нашрига бугун – 14 май кун эрталаб берган интервьюсида “Президент Зеленский Туркияга боради. Ҳатто Путин бевосита учрашувдан бош тортса ҳам. Бу бутун дунё учун аниқ сигнал бўлади: Москва тинчлик истамайди ва жиддий музокараларга тайёр эмас", — деб айтди.
Эслатиб ўтамиз, 11 майга ўтар кечаси Россия президенти Владимир Путин 15 май куни Истанбулда Россия–Украина музокаралари ўтказилиши мумкинлигини маълум қилган эди. Ундан бир неча соат аввал Киевда Зеленский ва Европанинг тўрт давлат раҳбарлари Москвадан камида 30 кунлик шартсиз ўт очишни тўхтатишни талаб қилишган.
Путин ўз чиқишида Истанбул музокараларида отишмаларни тўхтатиш масаласи муҳокама мавзуси бўлиши мумкинлигини айтган. Аммо Россия томонидан бу музокараларда ким иштирок этиши ҳанузгача аниқ эълон қилинмади. Зеленский эса фақат шахсан Путин билан юзма-юз учрашувни талаб қилмоқда.
"Умид қиламизки, стратегик ҳамкоримиз — АҚШ, ушбу жараёнда ўз роли ва иштирокини сақлаб қолади, — деди Ермак. — АҚШ президентининг махсус вакили Стив Уиткоффга конструктив мулоқот ва отишмаларни тўхтатиш — бу мантиқий қадам эканини тушуниб етгани учун миннатдормиз. Шунингдек, президент Трампга ҳам ташаккур билдирамиз: у аниқ сигнал берди — агар Путин тинчлик истамаса, Украина ўзи тасаввур қилганидан ҳам кўпроқ ёрдам олади".
Аввалроқ эса Зеленский, агар Путин учрашувга келмаса, Россия делегацияси билан учрашмаслигини айтган эди. Украина делегацияси ҳам Путин иштирок этмаса музокаралар самарали бўлмаслиги, шунчаки майда техник масалалар кўриб чиқилишини билдирган.
Абдуллоҳ Саййид
