Хитойнинг Гуйчжоу провинциясида юз берган фожиа оқибатида кўплаб инсонлар ҳаётдан кўз юмгани ва жароҳат олгани муносабати билан Ўзбекистон Президенти Шавкат Мирзиёев Хитой Халқ Республикаси Раиси Си Цзиньпинга таъзия йўллади. Бу ҳақда президент матбуот котиби Шерзод Асадов маълум қилди.
Унинг билдиришича, давлат раҳбари ҳалок бўлганларнинг оила аъзолари ва яқинларига ҳамдардлик билдириб, жабрланганлар тез орада соғайиб кетишини тилаган.
Хитойнинг Гуйчжоу провинциясида нима бўлган эди?
2025 йилнинг 4 май куни Хитойнинг Гуйчжоу провинциясида кучли шамол дарёда сузиб юрган тўртта сайёҳлик кемасини ағдариб юбориши оқибатида 10 киши ҳалок бўлган эди.
Ҳалок бўлганларнинг сўнггиси 5 май куни сувдан чиқариб олинган. Қолган йўловчилар қутқарувчилар томонидан қирғоққа олиб чиқилган.
Хитой ОАВнинг ёзишича, 70 киши тиббий ёрдам сўраб мурожаат қилган. Уларнинг барчасининг аҳволи қониқарли.
