АҚШ полицияси ресторанга вентиляция орқали ўғриликка кирмоқчи бўлиб, тиқилиб қолган жиноятчини қўлга олди, деб хабар берди “Lenta.ru” нашри.
Воқеа Нью-Йорк штатининг Рочестер шаҳрида рўй берди. Маҳаллий аҳоли вентиляция тизимидан эшитилаётган эркак чинқириғини эшитиб, полицияни, полиция эса эркакни қувурдан чиқариб олиш учун ёрдамга ўт ўчирувчиларни чақирди.
Маҳаллий ўт ўчирувчилар бошлиғи ўринбосарининг сўзларига қараганда, вентиляция қувури ресторан ошхонаси томон торайиб борганлиги сабабли ўғри қувурга тиқилиб қолган. У 17 йиллик хизмати давомида илк маротаба бундай воқеага гувоҳ бўлаётганлигини маълум қилди.
Жиноятчи жиддий жароҳат олмади, у қувурдан чиқариб олингандан кейин биринчи ёрдам кўрсатилиб, қамоққа олинди. У бинога ноқонуний равишда кирганликда, безориликда ва ўғрилик қуролларини олиб юрганликда айбланди.
