Замонамизнинг энг машҳур физиги Стивен Хокинг Римда касалхонага ётқизилди, деб хабар қилди “Vesti.ru” нашри.
74 ёшли ёшли олим Италия пойтахтидаги Папа фанлар академиясига конференцияга келган эди. Бу ерда у Франциск Рим Папаси билан учрашди. Стивен Хокинг 2 декабрь куни кечаси касалхонага ётқизилди. Ҳозирда унинг аҳволи бир мунча яхши.
Олим 22 ёшдалигида, 1963 йили унга “ёнбош амиотрофик склерози” ташхиси қўйилган. Ўшанда врачлар уни бор-йўғи 2-3 йил яшашини башорат қилишганди. Аммо физика фанининг машъали уларнинг башоратини чиппакка чиқарди. У нафақат илм-фан билан машғул бўлди, балки икки марта уйланиб, уч фарзанднинг отаси бўлишга ҳам улгурди.
Олим бутунлай фалаж бўлиб қолганига қарамай, фаол турмуш тарзини кечиради, компьютер нутқ синтезатори орқали дарс ўтади, нутқ сўзлайди, дунё аҳли билан мулоқотда бўлади. Стивен Хокингнинг “Вақтнинг қисқача таърифи” китоби 10 миллион нусхада чоп этилган. У квант космологиясининг асосчиларидан бири ҳисобланади, бундан ташқари болалар учун “Жорж ва Коинот сирлари” номли асарни ҳам ёзган.
