Олий Мажлиснинг Инсон ҳуқуқлари бўйича вакили (омбудсман) Ахборот хизматининг берган хабарига кўра, Омбудсманга 4 нафар фуқаро Кадастр агентлигининг Жиззах вилоят бошқармасидан асоссиз ишдан бўшатилганликлари сабабли ишга тиклашда ёрдам сўраб мурожаат қилган.
Ушбу мурожаат Омбудсман назоратига олиниб, ҳолатни жойига чиқиб ўрганиш учун Омбудсманнинг Жиззах вилоятидаги минтақавий вакили Ўткир Жўраевга юборилган. Ҳолат Жиззах вилоят камбағалликни қисқартириш ва Бандлик бош бошқармаси Давлат меҳнат назорат инспекцияси ходимлари билан ўрганилганда аниқланишича, 4 нафар мурожаатчи иш жойида штатлар қисқартирилганлиги важи билан ишдан бўшатилган, лекин, бу жараён меҳнат қонунчилигига мувофиқ амалга оширилмаган.
Шундан сўнг, мурожаатчиларни ишга тиклаш ва ойлик маоши ҳамда маънавий зарарларни ундириш бўйича фуқаролар манфаатида судга даъво ариза киритилган.
Фуқаролик ишлари бўйича Жиззах тумналараро судининг тегишли ҳал қилув қарори билан даъво қаноатлантирилиб, 4 нафар мурожаатчи олдинги эгаллаб турган лавозимлари учун бўш штатлар мавжуд эмаслиги сабабли, уларга тенглаштирилган ва юқори бўлган вазифаларга тикланган.
Шунингдек, уларнинг ҳар бирига ўртача 15 млн сўмга яқин ойлик иш ҳақлари ҳамда 6 млн сўмдан маънавий зарар, жами 83 млн сўмга яқин сумма ундириб берилган.
