Президентнинг тегишли қарори билан Фаррух Шарипов, Фарходжон Ташпулатов, Олим Омонов соғлиқни сақлаш вазирига ўринбосар этиб тайинланди. Бу ҳақда ССВ Матбуот хизмати хабар берди.
Фаррух Шарипов 1969 йилда Самарқанд вилоятида туғилган. 1993 йил Самарқанд давлат тиббиёт институти, 2010 йил Тошкент давлат иқтисодиёт университетини тамомлаган.
Тайинловга қадар 2021 йилдан буён Вазирлар Маҳкамаси ҳузуридаги Давлат тиббий суғуртаси жамғармаси ижро этувчи директори вазифасида ишлаб келаётган эди.
Фарҳоджон Ташпулатов 1983 йилда Тошкент шаҳрида туғилган. 2004 йилда Ўзбекистон давлат жаҳон тиллари университети, 2005 йилда Тошкент давлат иқтисодиёт университети қошидаги ихтисослаштирилган Олий бизнес мактабини тамомлаган.
Тайинловга қадар 2021 йилдан буён “Ўзагросуғурта” акциядорлик жамияти бошқаруви раисининг ўринбосари лавозимида фаолият кўрсатиб келаётган эди.
Олим Омонов 1979 йилда Самарқанд вилоятида туғилган. 2001 йилда Тошкент электротехника алоқа институти, 2006 йилда Тошкент ахборот технологиялари университети магистратура босқичи, 2010 йилда Президент ҳузуридаги Давлат ва жамият қурилиши академиясини тамомлаган.
Тайинловга қадар 2023 йил февралидан буён “Чорвоқ” туристик рекреацион зона дирексияси ДУК директори лавозимида ишлаб келаётганди.
