Ижтимоий тармоқларда эҳтиётсизлик оқибатида уксус ичириб қўйилган 8 ойлик гўдакнинг яқинлари томонидан Республика шошилинч тиббий ёрдам илмий маркази Қашқадарё филиали ходимлари беморга совуққонлик билан қарашаётгани ҳақида хабарлар тарқалди. Мазкур мурожаат юзасидан Қашқадарё вилояти соғлиқни сақлаш бошқармаси ахборот хизмати расмий муносабат билан чиқди.
Маълум қилинишича, шаҳрисабзлик 2023 йил 7 февралда туғилган бемор И. Х. РШТЁИМ Қашқадарё филиали реанимация бўлимига 2023 йил 9 сентябрь куни соат 15:32 да оғир аҳволда олиб келинган. Ота-онасининг сўзларига кўра, шу куни соат 12 лар атрофида назоратсизлик ва эҳтиётсизлик оқибатида гўдакка сувда эритилмаган юқори концентрацияли сирка кислотаси ичирилган. Оқибатда аҳволи оғирлашган гўдак дастлаб Шаҳрисабз тумани тиббиёт бирлашмаси болалар шифохонасига келтирилган. Сўнг филиалга юборилган.
Беморга: «Сирка кислотасидан ўткир заҳарланиш. Оғиз бўшлиғи, лаблари, ҳалқум, ҳиқилдоқ ва қизилўнгач шиллиқ қаватларининг 1-2 даражали кимёвий куйиши.Токсик нефрит, токсик миокардит, токсик пневмония» ташхиси қўйилиб, реанимация бўлимига ётқизилган ва стандарт бўйича интенсив даво муолажалари бажарилмоқда.
Касалликнинг 2-суткасида юқори нафас йўллари куйиши натижасида юқори нафас йўллари стенози ва шиши ривожланиб, беморда нафас етишмовчилиги 3-даражаси ва юрак қон-томир етишмовчилиги натижасида тўсатдан юрак тўхташи кузатилди. Интенсив реанимацион чоралар кўрилганидан сўнг юрак уриши тикланди ва бемор сунъий нафас аппаратига ўтказилди. Беморда стандарт асосида тўлиқ реанимацион чора-тадбирлар давом эттирилмоқда.
Мурожаатда беморга тиббий хизмат кўрсатган шифокорлар шаънига (масалан, "супер-контракт"да ўқиган" қабилида) асоссиз гаплар айтилган. Ваҳоланки, улар кўп йиллик тажрибага эга бўлган, олий тоифали врачлар ҳисобланади. ЛОР шифокор санитар авиация йўналиши орқали олиб келинган, гўдакнинг аҳволи оғирлиги сабабли у тўғридан-тўғри реанимация бўлимига келиб, формасиз бўлса ҳам шошилинч ёрдам кўрсатишни лозим деб топган.
Шундан сўнг токсиколог, реаниматолог, комбустиолог, болалар хирурги ва бошқа мутахассислар иштирокида консилиум ўтказилган. Республика шошилинч тиббий ёрдам илмий маркази мутахассисларидан телемедицина орқали тегишли тавсиялар олинмоқда.
Таъкидлаш зарурки, 7 ойлик чақалоқ учун ушбу ҳолат ўта оғир ҳисобланади. Бола организми ҳали бундай жароҳатни кўтариши қийин. Бемор тана ҳароратининг кўтарилиши токсик пневмония билан боғлиқ.
