Аввал хабар берганимиздек, Самарқанд шаҳрида 7—8 сентябрь кунлари Озиқ-овқат хавфсизлигига бағишланган халқаро конференция бўлиб ўтади. Унда иштирок этиш учун дунёнинг 32 та мамлакатидан 2 минг 330 нафар хорижий экспертлар Самарқандга етиб келди.
шу билан бирга конференцияда Ўзбекистон қишлоқ хўжалиги соҳасида фаолият юритаётган фермерлар, кластерлар ва илмий-тадқиқот институтлари ҳам иштирок этмоқда.
Darakchi.uz конференцияда иштирок этаётган Шоличилик илмий-тадқиқот институти директор ўринбосари Зоҳид Зиёдуллаев билан суҳбатлашди. Олимнинг маълум қилишича, Ўзбекистонда шолининг жўяклаб суғориладиган навлари етиштирилади.
Унга кўра, “Эртага қишлоқ хўжалигида озиқ овқат хавфсизлиги бўйича конференсия бўлиши кутилмоқда. Биз ўзимизнинг институтимизда ишлаб чиқилган янги навлар, янги технологиялар билан қатнашмоқдамиз.
Ҳозирда биз Флиппиндаги халқаро Шоличилик илмий-тадқиқот институти билан биргаликда қурғоқчиликка чидамли навларни яратиш бўйича селекция ишларини бошладик.
Ҳозирги вақтда биз 272 та навларини олиб келиб, тадқиқот ишларини олиб бормоқдамиз.
Биламизки, шоли асосан бостириб суғорилади. Лекин бу навларда жўяклаш орқали суғорилади.
Ҳозир етиштирилаётган шолининг гектарига 22-24 минг метр куб сув талаб қилинаётган бўлса, янги навларни, 7-9 минг метр куб сув билан етиштирса бўлади”, деди олим.
