"Fitch ratings" халқаро рейтинг агентлиги “Ўзагросуғурта” АЖ ва унинг таъсислигидаги “Агрос Ҳаёт суғурта компанияси” АЖнинг молиявий барқарорлик рейтингини “ББ- ” (“Барқарор” прогнози) даражасида тасдиқлади.
Ушбу рейтинг кўрсаткичи компания зиммасига олган мажбуриятларни ўз вақтида бажарилиши кафолатини, юқори салоҳиятли инвесторлар учун ишончлилик даражасини белгилайди. Бу эса хорижий инвесторлар ва маҳаллий аҳолининг “Ўзагросуғурта” АЖ томонидан кўрсатиладиган суғурта хизматларига ишончини янада мустаҳкамлашнинг муҳим индикатори ҳисобланади.
"Fitch ratings" ҳисоботида, мазкур рейтинг “Ўзагросуғурта” АЖ давлат тасарруфида эканлигини ҳамда унинг мамлакат агросаноат мажмуасидаги муҳим тизимли роли мавжудлигини ифодалаши таъкидланган.
“Ўзагросуғурта” АЖнинг мустақил кредит сифати унинг капитал ҳолати яхшиланганидан далолат беради. Бундан ташқари, ҳисоботда “Ўзагросуғурта” АЖнинг 94,6 фоиз улуши Ўзбекистон Республикаси Давлат активларини бошқариш агентлигига тегишли бўлиб, 2023 йил охирига қадар жамият акцияларининг 2 фоизи Ҳукумат томонидан бирламчи оммавий жойлаштириш йўли орқали сотувга қўйилиши режалаштирилгани қайд этилган.
Таъкидлаш жоизки, “Ўзагросуғурта” АЖнинг капитал позицияси “Фитч”нинг призма омилларига (ФБМ) асосланган модели ёрдамида баҳоланганда, 2021 йилдаги “адекват” кўрсаткичдан 2022 йилда “кучли” даражага яхшиланган.
“Ўзагросуғурта” АЖнинг инвестиция фаолияти таҳлил қилинган бўлиб, унга кўра Жамият инвестиция маблағларини асосан банк депозитларига, хусусан кўплаб маҳаллий давлат банкларига жойлаштирганлиги қайд этилган, бу кўрсаткич эса ўз навбатида 2022 йил якунига кўра Жамият томонидан инвестицияга йўналтирилган активларнинг 66 фоизини ташкил этмоқда.
Умуман олганда, "Fitch ratings" Жамиятнинг қишлоқ хўжалиги суғуртасидаги тизимли роли сабабли Давлат томонидан “Ўзагросуғурта” АЖ устидан назорат сақлаб қолинишини маълум қилган.
