Россияда бўлиб ўтган фожиали воқеалар ҳақида давлат раҳбарининг матбуот котиби Дмитрий Песков "Вагнер" асосчиси Евгений Пригожинга нисбатан жиноий иш тўхтатилишини, у "Беларусга кетганини" ва исён билан боғлиқ вазият Украинага қарши жангнинг боришига таъсир қилмаслигини айтди.
Песковнинг маълум қилишича, кеча эрталаб Россия ва Беларус президентлари ўртасида бўлиб ўтган суҳбатда Лукашенко вазиятни ҳал қилиш учун воситачилик саъй-ҳаракатларини амалга оширишини билдирган.
"Александр Григоревич Пригожин билан узоқ вақтдан бери, тахминан 20 йилдан буён таниш. Бу унинг шахсий ташаббуси бўлган таклиф эди. Бу саъй-ҳаракатлари учун Беларус президентидан миннатдормиз”, - дейди Песков.
Унинг сўзларига кўра, икки президент Пригожин билан келишув шартлари ҳақида вазиятни "кейинчалик йўқотишларсиз", "кучланиш даражасини оширмасдан" ҳал қилиш кераклиги хусусида гаплашишган. Натижада, Вагнер" ўз лагерларига қайтиши тўғрисида келишувга эришилган. Хоҳлаганлар, келажакда Россия Мудофаа вазирлиги билан шартнома имзолашлари мумкин.
Маълум қилинишича, "Вагнер" жангчиларига, уларнинг фронтдаги хизматларини ҳисобга олган ҳолда таъқиб қилинмайди. Кремль уларга бўлган бу ҳурматни доимо сақлаб қолишини билдирган. Воситачилик ҳаракатларидан мақсад қон тўкилишига, ички қарама-қаршиликларга, тўқнашувларга йўл қўймаслик бўлган.
Қайд этилишича, Пригожинга нисбатан жиноий иш тўхтатилади ва унинг ўзи Беларусга кетади. У Беларусда нима қилиши, ҳозир қаердалигини Кремль билмайди.
Таъкидланишича бу ҳолатлар Россиянинг Украинада олиб бораётган жанглардаги жараёнларга таъсир қилмайди.
Песков Мудофаа вазирлигидаги кадрлар ўзгариши президентнинг Олий Бош қўмондон сифатидаги мутлақ ваколати бўлгани учун музокаралар чоғида бу мавзу кўтарилмаганлигини айтган.
Шунингдек, Матбуот котиби Путин томонидан янги мурожаатлар қилиш режалаштирилмаганлигини, кеча давлат раҳбари Кремлда бўлганлигини қайд этган.
