Россия Федерацияси Президентининг матбуот котиби Дмитрий Песков Россия Каховка ГЭСини портлатиш айбловларини қатъиян рад этишини ва барча жавобгарликни Украина расмийлари ўз зиммасига олишини айтди.
Херсон вилоятидаги Каховка гидроэлектр станциясининг ўққа тутилиши натижасида юзага келган вайронагарчилик туфайли 80 га яқин аҳоли пункти сув тошқини остида қолиши мумкин.
Новокаховка шаҳар округи ҳудудида Каховка ГЭСининг вайрон бўлиши муносабати билан маҳаллий фавқулодда ҳолат режими жорий этилди.
Новокаховка мери Владимир Леонтевнинг айтишича, ҳудудни ўққа тутиш давом этмоқда.
Қайд этилишича, Днепрнинг қуйи оқимида сув сатҳи беш метрга кўтарилган, бир нечта оролларни бутунлай сув босган. Сув 12 метрдан кўпроқ кўтарилиши мумкин, аммо ҳозирча бу содир бўлмаган. Днепрнинг қирғоғидаги қишлоқларида одамлар учун ҳеч қандай таҳдид йўқ. Ҳокимиятга кўра, Херсон, Голая Пристан ва Алёшки каби шаҳарлар аҳолиси сув тошқини зонасини тарк этади.
Станцияга етказилган зарар Қримга сув етказиб бериш билан боғлиқ муаммоларни туғдириши мумкин.
ГЭС клапанларининг бузилиши натижасида сув босган 300 га яқин уй аҳолисини эвакуация қилиш бошланди, деди Владимир Леонтиев. Унинг аниқлик киритишича, одамлар автобусларда олиб кетилмоқда. “Прогнозларга кўра, 72 соат ичида сув нормал даражага тушади. Аммо биз бу 72 соатдан омон қолишимиз керак”, — дея қўшимча қилди мер.
Украина томони Херсон ва Днепрнинг ўнг қирғоғидаги бошқа аҳоли пунктларида эвакуация бошланганини маълум қилди. Бундан ташқари, Леонтиев ГЭСнинг вайрон бўлиши жуда жиддий эканлигини ва қайта тиклаш ўтган асрнинг ўрталарида бўлгани каби қурилишни талаб қилишини айтди.
Сўнгги маълумотларга кўра, Каховка сув омборида сув сатҳи соатига 12 сантиметрга пасаймоқда, деди маҳаллий маъмурият вакили Владимир Рогов. Шу билан бирга, у ГЭСнинг вайрон бўлиши Запороже атом электр станциясининг фаолиятига таҳдид солмаслигини таъкидлади. Росэнергоатом, Каховка ГЭСининг шикастланиши сабабли Запориже АЭС учун хавфлар минимал эканлигини айтади.
Бундай вайронагарчилик сув омборининг жиддий саёзлашишига олиб келмайди, дейди техника фанлари доктори Владимир Тетелмин.
