Ижтимоий тармоқларда Тошкент—Москва йўналишида учган самолёт Внуково аэропортига қўндирилган. Самолёт қўнганидан кейин 210 нафар йўловчи 4 соат давомида бортда қолиб кетгани акс этган видео тарқалди.
Маҳаллий аэропорт автобус ажратишдан бош тортган, бироз вақт ўтиб бортда муштлашув бошланган.
"Uzbekistan Airways" Ахборот хизматининг маълум қилишича, 7 март куни HY-601 Тошкент – Москва йўналишидаги авиақатнови ҳаво кемаси Домодедово аеропортининг об-ҳаво шароити (учиш-қўниш йўлагининг ҳолати хавфсиз қўнишни амалга ошириш учун зарур талабларга жавоб бермаганлиги) сабабли Внуково халқаро аэропортига мажбурий қўнишни амалга оширган.
Авиақатнов ҳаво кемаси сардори йўловчиларга йўналиш Внуково муқобил аэропортига ўзгаргани ҳақида маълумот берган.
Об-ҳаво яхшилангани ва ҳаво кемаси Домодедово халқаро аэропортига учиб кетишга тайёр бўлганидан сўнг, экипаж парвозга тайёрлигини эълон қилган. Шу пайт ҳаво кемаси бортидаги аёл ўзини ёмон ҳис қилгани маълум бўлиб, экипаж шифокорларни чақиришга мажбур бўлган. Бу эса учиб кетиш вақтининг кечикишига таъсир қилган. Шу пайтда Домодедово халқаро аэропортидаги об-ҳаво яна кескин ёмонлашади ва бу кейинги кечикишга олиб келади.
Кейинчалик ҳаво кемасидаги барча 210 йўловчини Внуково халқаро аэропортига тушириш тўғрисида қарор қабул қилинган.
