Туркия ва Суриядаги зилзила қурбонларининг умумий сони 28 минг кишидан ошди, деб ёзади The Washington Post.
Газетанинг ёзишича, омон қолганларни топиш давом этмоқда. Нашрнинг эслатишича, Туркия вице-президенти Фуат Ўқтай аввалроқ қурбонлар сони 24 617 нафарга етганлигини айтган эди. Камида 80 минг киши турли даражада жароҳат олган.
Суриядаги манбаларга кўра, 11 февраль, шанба куни қурбонларнинг умумий сони 3553 кишига етган. Журналистларнинг таъкидлашича, Суриядаги қурбонлар ва қурбонлар ҳақидаги маълумотлар бир неча кундан бери янгиланмаган.
Туркия жануби-шарқида 6 февраль куни эрталаб 1939 йилдан бери энг кучли - 7,8 магнитудали зилзила рўй берган эди. Ер қобиғининг тебранишлари мамлакатнинг кўплаб шаҳарларида, жумладан Кайсери, Адана, Мерсинда сезилди. Бундан ташқари, ер силкинишлари Сурия, Ливан, Ироқ ва бошқа бир қатор мамлакатларда қайд этилган.
