Ижтимоий тармоқларда Тошкентдаги “Бек барака” бозорида ИИБ ходимлари кекса аёлга куч ишлатиб, буюмларини олиб қўйгани акс этган видео тарқалди.
Тошкент вилоят ИИББ Ахборот хизмати раҳбарининг маълум қилишича, савдо мажмуаси олдидан ўтган, автомобиллар ҳаракатланиши учун мўлжалланган йўлнинг қатнов қисмида (йўл ёқасида) ва пиёдалар ўтиш йўлагида, бир нечта фуқаролар ёйма савдо ташкил қилишлари оқибатида, йўлда тирбандликлар юзага келган.
Шунингдек, пиёдалар йўлагида ҳам савдо қилиниши сабабли йўлдан ўтувчиларга ноқулайлик келиб чиққан.
Ушбу сотувчиларга бозор ичкарисидан, савдо учун жой ажратиб берилган бўлсада йўл ёқасида ишлаш давомли бўлгани учун, ҳудуддан ҳаракатланувчи ҳайдовчилар, пиёда фуқаролар ва бозор маъмурияти томонидан тегишли ташкилотларга бир қанча мурожаатлар келиб тушган.
Унга кўра, 20 январь куни Зангиота тумани ДСИ, туман СЕО, Ободонлаштириш ва туман Прокуратураси ходимлари билан ҳамкорликда ўрганиш ишлари олиб борилган.
Жараёнда бозор маъмурияти ва ёйма савдо билан шуғулланувчилар ўртасида ўзаро тортишув келиб чиққан.
Шундан сўнг жамоат тартибини сақлар мақсадида воқеа жойига ИИБ ходимлари жалб этилганлар.
Хизмат фаолияти давомида одамларни тинчлантириш, тартибни сақлашга кескин қаршилик қилиб, жанжал кўтарган бир нафар фуқаро (аёл)нинг буюмлари ва ўзи ИИБ га олиб борилган.
Айтилишича, ҳеч кимга нисбатан тан жароҳати ёки ноқонуний, қўпол ҳатти ҳаракатлар қилинмаган.
"Ҳозирда ҳолат юзасидан қўшимча ўрганиш ва суриштирув ишлари олиб борилмоқда. Натижасида юзасидан батафсил ахборот берилади", дейилади баёнотда.
