Youtube платформасида “Фарғоналик бу онахонни ким йиғлатди? Унинг қизи қамоқда. 4 та бола эса оч қолган” сарлавҳали видеомурожаат жойлаштирилди. Унда бир аёл йиғлаб, қизи қамалганини айтиб президентга мурожаат қилган. Аёл қизини ИИБ ходимлари қамоққа олгани, ҳозирда фарзандларини боқишига умуман пули йўқлигини, адвокатлар пулга "сотилиб" кетаётгани ва уни ҳеч ким ҳимоя қилмаётганини айтган.
Аёлнинг сўзларига кўра, унинг қизида айб йўқ. Барчасига Рустам исмли шахс айбдор. Чунки у қизни "завод қурамиз, фабрика очамиз", деб алдаб, бир неча фуқаролардан пул олдирган. Қиз эса унга ишониб, 19 нафар фуқародан фоиз билан қайтариш эвазига жуда кўп маблағларни йиғиб олган.
Ушбу ҳолат Фарғона вилояти ИИБ томонидан ўрганиб чиқилди. Маълум бўлишича, мурожаатда Рустам дея аталган шахс (айбланувчи)га Жиноят кодексининг 168-моддаси 4-қисми “а” банди билан жиноят иши қўзғатилган. Маълумот ўрнида: ушбу моддада фирибгарлик, яъни алдаш ёки ишончни суиистеъмол қилиш йўли билан ўзганинг мулкини ёки ўзганинг мулкига бўлган ҳуқуқни қўлга киритиш учун жазо белгиланган.
Мазкур иш Жиноят ишлари бўйича Фарғона шаҳар судида кўриб чиқилган. Суд жабрланувчи Наргиза Абдуллаева (видеодаги аёлнинг қизи) ва фуқаро А.Ю. нинг ҳаракатларида жиноят аломатлари бор ёки йўқлигига ҳуқуқий баҳо бериш учун ажрим чиқарган.
Олиб борилган тергов ҳаракатлари давомида жами 19 нафар фуқаролар жабрланувчи сифатида сўроқ қилинган.
Натижада, мурожаатчининг қизи ва унинг шериги ушбу фуқароларнинг барчасидан ҳар ойда фойда билан қайтариш эвазига пул олиб, молиявий пирамида ташкил этгани аниқланган.
Гувоҳларнинг кўрсатмалари ва тергов жараёнида тўплаган бошқа далилларга асосан Н.А. ва А.Ю.лар Жиноят Кодексининг 221-моддасига асосан, гумонланувчи сифатида қўлга олинган.
2022 йил 28 декабрь куни гумонланувчи Н.А ЖКнинг 168-моддаси 4-қисми “а” банди билан, А.Ю. эса ушбу модданинг 3-қисми “а,б” бандлари билан айбдор деб топилиб, қамоққа олинган. Шундан сўнг 30-декабр куни қўшимча айблов хулосаси Жиноят ишлари бўйича Фарғона шаҳар судига юборилган.
