Самарқандда байрам куни машинасида "дрифт" бажарган ҳайдовчига 15 сутка маъмурий қамоқ жазоси тайинланди. Бу ҳақда ЙҲХХ ахборот хизмати хабар берди.
Қайд этилишича, 2022 йил 31 декабрь кунидан 2023 йил 1 январь кунига ўтар кечаси соат 01:00 ларда Самарқанд шаҳрининг "Хўжа Аҳрор Валий" кўчасида "Mercedes-Benz" русумли, 01L700OA давлат рақам белгили автомобиль ҳайдовчиси, 1987 йилда туғилган Р.А. атрофдаги фуқаролар эътиборини жалб этиш мақсадида хавфли бўлишига қарамасдан турли манёврлар билан "дрифт"лар бажарган. Жамоат жойида юриш-туриш қоидаларини бузганлиги етмагандек, уни тартибга чақиришга уринган ходимларнинг ҳам қонуний талабларига бўйсунмаган.
Юқоридаги ҳолатлар бўйича тўпланган ҳужжатлар бугун, 2023 йил 3 январь куни Жиноят ишлари бўйича Самарқанд шаҳар суди томонидан ўрганилиб, фуқаро Р.А.нинг хатти-ҳаракатларида Ўзбекистон Республикаси МЖтКнинг 183-, 194-модда 1-қисм ва 195-моддаларида назарда тутилган ҳуқуқбузарлик аломатлари мавжуд деб топилиб, унга нисбатан 15 сутка маъмурий қамоқ жазоси тайинланди, дейилади хабарда.
Эслатиб ўтамиз, аввалроқ ҳолат юзасидан вилоят ИИБнинг берган маълумотларини эълон қилган эдик.
