Шу кунларда дунё бўйлаб “Спинал мушак атрофияси бўйича хабардорлик ойлиги” ўтказилмоқда.
Шу муносабат билан Cоғлиқни сақлаш вазирлиги билан “СМА УМИД” нодавлат-нотижорат ташкилоти ҳамкорлигида ушбу ирсий касалликка чалинган болаларга кўрсатилаётган тиббий хизмат мавзусида матбуот анжумани бўлиб ўтди. Бу ҳақда вазирлик Матбуот хизмати хабар бермоқда.
Таъкидланишича, прогрессив мушаклар кучсизлашуви ривожланиши билан тавсифланувчи спинал мушак атрофияси (СМА) ҳаёт учун хавфли генетик касаллик ҳисобланади.
Хасталик ногиронликнинг оғир шакли ҳамда ҳаракат чекланиши билан боғлиқ. Бинобарин, у ирсий касалликлар туфайли болалар ўртасида содир бўладиган ўлим ҳолатларининг энг кенг тарқалган омилларидан биридир.
Тадбирда ушбу касалликка қарши курашда давлат даражасида қатор ишлар амалга оширилаётгани таъкидланди. Маълумки, СМАга чалинган барча беморларнинг муолажа учун зарур бўлган қиммат дори воситаларини харид қилишга қурби етмайди. Шу боис Президентимизнинг шу йил апрель ойида имзоланган тегишли қарорига мувофиқ, 2022 йилда спинал мушак атрофияси касаллигига чалинган беморларни дори воситалари билан таъминлаш учун давлат бюджетидан 115 миллиард сўм ажратилиши белгиланди.
— Эҳтиёжманд фуқароларимизга ғамхўрлик кўрсатиш жамият ва давлатнинг бағрикенглиги ифодасидир, — деди Соғлиқни сақлаш вазири ўринбосари Элмира Баситханова. — Айни пайтда Ўзбекистонда 93 нафар СМА касаллигига чалинган бемор мавжуд. Мамлакат раҳбарининг тегишли қарори қабул қилинган вақтда рўйхатда турган 76 нафар беморни июнь ойидан бошлаб дори воситалари билан бепул таъминлаш бўйича давлат дастури кучга кирди. Ҳужжат имзолангандан кейин яна 17 нафар бемор аниқланди. Ҳадемай улар ҳам спинал мушак атрофияси клиник диагнозига эга бўлган оилаларнинг Ягона миллий регистрига киритилиб, давлат дастуридан фойдаланиш имкониятига эга бўлади.
Бундан ташқари, ҳозирги кунда У.Қ.Қурбонов номидаги Республика болалар руҳий-асаб шифохонасида бундай беморлар учун ётоқ-жойлар ҳам ажратилган.
