Бу ҳақда Ўзбекистон оғир атлетика федерацияси Халқаро оғир атлетика федерацияси (IWФ)га таяниб маълум қилди.
Жорий йил бир қатор спорт турлари бўйича Париж-2024 ўйинларига рейтинг очколарни тақдим этадиган спорт мусобақалари ўтказилиши белгиланган.
Ана шундай баҳслардан бири шу йилнинг октябр-ноябр ойларида Хитойнинг Чунсин шаҳрида оғир атлетика бўйича катталар ўртасида ўтадиган жаҳон чемпионати ҳисобланаётганди.
Бироқ, куни кеча 23-март куни Хитой оғир атлетика федерацияси мамлакатда коронавирус касаллигининг янги тўлқини ёйилиши сабабли ушбу чемпионатни қабул қила олмаслиги бўйича Халқаро оғир атлетика федерациясига мурожаат йўллади.
Айнан ушбу чемпионатда жаҳон оғир атлетикачилари 2024-йилги Олимпия ўйинлари учун илк рейтинг очколарини жамлаши лозим эди.
Халқаро оғир атлетика федерацияси (IWФ) сайтининг маълум қилишича, ҳозирда мазкур чемпионатни қабул қиладиган янги номзод давлат қидирилмоқда.
Эслатиб ўтамиз, 2024-йилги Олимпия ўйинларидаги оғир атлетика баҳсларининг эркаклар ва аёллар ўртасидаги вазн тоифалари 5+5 этиб тасдиқланган. Яъни, Париж спорт майдонларида эркаклар 61, 73, 89, 102, +102 килограммда, аёллар 49, 59, 71, 81, +81 килограммда XXXIII ёзги Олимпия ўйинларининг медаллари учун кураш олиб боришади.
