Бу ҳақда Халқаро Нотариуслар Иттифоқи Ассамблеяси қарор қабул қилди, дея хабар бермоқда Адлия вазирлиги.
Қайд этилишича, иттифоқ аъзолигига кириш учун давлатлар нотариат тизими қуйидаги юқори стандартларга жавоб бериш талаб этилади:
- Тизимда нодавлат нотариуслар (хусусий нотариуслар) фаолиятининг мавжудлиги;
- нотариат соҳасини тартибга солувчи қонун ҳужжатлари лотин нотариал моделига мувофиқ бўлиши;
- мулкчиликка оид миллий қонунчилик ҳужжатларининг халқаро хусусий ҳуқуқ нормаларига мутаносиб бўлиши ва бошқалар.
Таъкидланишича, Ўзбекистонда 2020 йилдан хусусий нотариуслар фаолияти йўлга қўйилгандан сўнг, аъзолик учун ариза берилган.
"Жорий йилнинг 22-24 сентябрь кунлари махсус делегация Ўзбекистонга келиб, бизнинг нотариат тизимимизни тўлиқ ўрганиб кетгач, ижобий баҳо берилди ва Иттифоқ Ассамблеяси бир овоздан Ўзбекистонни Иттифоқ аъзолигига қабул қилди",-дея маълум қилади вазирлик.
Маълумот учун, бугунги кунда Иттифоққа 90 дан ортиқ давлатлар аъзо ҳисобланади.
