Корея Республикасида коронавируснинг «омикрон» штамми қайд этилгани сабабли ва унинг кенг тарқалишини олдини олиш мақсадида 3-16 декабрь кунлари давомида мамлакатга кириб келаётган барча фуқаролар 10 кунлик карантинни ўтайди. Бу ҳақда Ўзбекистон Ташқи меҳнат миграцияси агентлиги хабар берди.
Маълум қилинишича, мазкур тартиб қайси давлатдан ташриф буюраётгани ва вакцина олган ёки олмаганидан қатъи назар барча фуқаролар учун амал қилади.
Бунда, Корея Республикаси фуқаролари ва мамлакатда доимий истиқомат қиладиган фуқаролар 10 кунлик карантин муддатини ўз уйларида яккаланган ҳолда ўтайди.
Шунингдек, Корея Республикасига кириб келишдан олдин, кириб келган кунда ва карантиндан чиқаётган кунда – жами 3 маротаба ПЦР тест топширилиши барча кириб келаётган фуқаролар учун мажбурий этиб белгиланган.
