Бундан бир ой олдин Darakchi.uz мухбирининг режиссёр Рустам Саъдиев билан уюштирилган интервьюсида “Барон” фильми “қароқчилар” қўлига чиқиб кетиши тўғрисида ўз фикрини билдирганди.
— Насиб қилса “Барон” “Сотқин” каби қўлга чиқиб кетмайди. Ҳамма йўл қўйган камчиликларимизни таҳлил қилиб шунга яраша чора-тадбирларни қилиб қўйганмиз.
Бироқ намойиши бошланганига атиги бир ҳафта бўлган фильм қўлга чиқиб кетгани ҳақидаги маълумотлар тарқалди.
Мазкур вазиятга режиссёр “Qalqmpir.uz” сайтига қуйидагича изоҳ берди:
— Фильмнинг диски тарқаб кетганидан хабарим бор. Бироқ видео "қароқчилар”нинг қўлидаги диск катта экранларда намойиш этилаётганидан анча фарқ қилади. Фильмнинг хомаки нусхаси бозорлар ва диск дўконларида сотиляптими ёки йўқ, бунисидан хабардор эмасман. Лекин бу ишлар шунчаки жавобсиз қолмаслиги тайин. Мендан “Барон”нинг иккинчи қисмларини суратга оласизми, деб жуда кўп сўрашяпти. Фильмнинг давомини суратга олишим ва ўзбек киносининг янада ривожланиши, шубҳасиз кинотеатрларга келаётган томошабинларга боғлиқ. Менимча, ўзини ҳурмат қилган, юзлаб кишиларнинг меҳнатини қадрлайдиган асл томошабинлар фильмни кинотеатрларга келиб томоша қилишади.
Аввалроқ Алишер Навоий номли киносаройда “Барон”га бир ҳафтада 324 миллион сўмлик чипта сотилгани ҳақида хабар бергандик. Эслатиб ўтамиз, "Барон"нинг бюджети 1,5 миллиард сўмни ташкил қилади.
