Volkswagen корпорацияси бошлиғи Маттиас Мюллер “Дизель можароси” деб номланган можаролар учун америкаликлардан узр сўради. Бу ҳақда “ТАСС” хабар бермоқда.
“Биз Америкадаги тегишли ҳукумат органлари ва кенг жамоатчиликдан иборат мижозларимизнинг хафсаласини пир қилдик. Volkswagen`нинг хатолари учун узр сўрайман ”, — деди корпорация бошлиғи Детройт шаҳридаги матбуот анжуманида.
У шунингдек, корпорация АҚШга $900 минг инвестиция киритиши ва ўрта ҳажмдаги автомобиллар ишлаб чиқаришини маълум қилди.
Концерн бошлиғининг сўзларига кўра, Теннеси штати Чаттануга шаҳридаги Volkswagen заводига инвестиция киритилиши 2 мингга яқин кишини иш билан таъминланишига олиб келади.
“АҚШ Volkswagen учун асосий бозорлардан бири бўлиб қолади”, — дейди Мюллер.
Эслатиб ўтамиз, Германиянинг Volkswagen концерни атрофидаги можаролар автомобилларга ўрнатилган экологияни ифлослантириш даражасини камайтириб кўрсатувчи дастурнинг ҳукумат томонидан аниқланишидан кейин бошланган эди.
