Индонезия махсус хизмати турли провинцияларда ўтказилган рейдларда бир нечта теракт уюштиришни режалаштирган шахсларни қўлга олди. Бу ҳақда “ТАСС” хабар бермоқда.
Террорчилар черков ҳамда полиция пунктларига ҳужум уюштиришни режалаштирган.
“Беш кун мобайнида ўтказилган рейдлар натижасида Рождество ва Янги йил байрами арафасида теракт уюштирмоқчи бўлган 11 киши ҳибсга олинди. Террорчилик ҳаракати учун икки ҳудкуш террорчи ҳам тайёрланган эди”, – дейилади хабарда.
Ҳудкуш террорчилардан бири уйғур миллатига мансуб 35 ёшли Али исмли шахс эканлиги айтилмоқда. У қалбаки Индонезия паспорти билан Батам ороли орқали мамлакат ҳудудига кириб олган. Бунгача эса у Малайзия ва Тайландда яшаган.
Алини ҳибсга олиш жараёнида терактни содир этиш воситаси бўлган икки компьютер, мобил телефон аппарати мусодара қилинган. Ҳибсга олинган террорчилар орасида “Ал-Қоида” террорчилик гуруҳи аъзоларидан бири Чоирул Анам ҳам борлиги таъкидланмоқда.
