Davlat rahbari Xotira va qadrlash kuni munosabati bilan tashkil etilgan marosimda ishtirok etdi. An'anaga muvofiq, Prezident “Matonat madhiyasi” yodgorligi poyiga gulchambar qo‘ydi.
“Bugun oramizda sog‘-salomat yashab kelayotgan urush va mehnat faxriylari, barcha nuroniylarimizga alohida mehrimiz va ehtiromimizni izhor etamiz. Ushbu majmua buyuk g‘alabaga munosib hissa qo‘shgan ko‘p millatli xalqimizning jasorati va qahramonligini tarannum etadigan tabarruk maskan, desak, to‘g‘ri bo‘ladi”, dedi Shavkat Mirziyoyev.
Ma’lumotlarga ko‘ra, fashizmga qarshi janglarda o‘sha vaqtda 6,8 million nafar aholiga ega bo‘lgan O‘zbekistondan qariyb 2 million kishi ishtirok etgan. Ulardan 540 mingga yaqini halok bo‘lgan, 158 ming nafari bedarak yo‘qolgan. Shuningdek, 50 mingdan ortiq kishi kontslagerlarda halok bo‘lgan, 60 mingdan ziyodi esa nogiron bo‘lib qaytgan.
Tadbirda O‘zbekiston Qurolli Kuchlari, davlat va jamoat tashkilotlari vakillari, mahalla faollari hamda nuroniylar ishtirok etib, yodgorlik poyiga gullar qo‘ydi.
Shuningdek, Prezident “Millat fidoyilari” xiyobonida ham bo‘lib, mustaqillik yillarida mamlakat himoyasi yo‘lida halok bo‘lgan harbiy xizmatchilar va huquq-tartibot idoralari xodimlari xotirasiga hurmat bajo keltirdi.
“Bir yil oldin mana shu hududda ‘Millat fidoyilari’ majmuasini barpo etganimiz bejiz emas. U Vatan himoyasi har bir avlodning muqaddas burchi ekanini, vatanparvarlik an’analari davomiyligini eslatib turadi”, dedi davlat rahbari.
Shavkat Mirziyoyev farzandlarini Vatan himoyasiga tayyor, jasur va vatanparvar etib tarbiyalagan ota-onalarga ham minnatdorlik bildirdi.
