2026 yil 1 martdan boshlab retsept asosida beriladigan qariyb 2000 nomdagi dori vositalarining chakana narxlari pasaytirildi. Bu haqda Farmatsevtika tarmog‘ini rivojlantirish agentligi ma’lum qildi.
Bildirilishicha, iste’molchilar dori vositalarini xarid qilishdan oldin ularning belgilangan referent (cheklangan) narxini maxsus raqamli platformalar orqali tekshirishi mumkin. Buning uchun pharm.gov.uz sayti hamda PharmUz mobil ilovasidan foydalanish tavsiya etilgan.
Mazkur xizmatlar orqali foydalanuvchilar dori vositasi nomi, ishlab chiqaruvchisi va belgilangan chakana narxi haqidagi ma’lumotlarni ko‘rishi mumkin. Bu esa dorixonalarda dori vositalarining sun’iy ravishda qimmat narxda sotilishining oldini olishga xizmat qiladi.
Agar dori vositasining belgilangan referent narxidan yuqori bahoda sotilayotgani anqalansa, iste’molchilar PharmUz ilovasidagi "Shikoyatlar" bo‘limi orqali murojaat qoldirishi mumkin. Murojaatlar vakolatli organlar tomonidan ko‘rib chiqilib, qonunbuzarlik anqalansa tegishli choralar ko‘riladi.
Shuningdek, dorixonalardan dori vositalarini sotishda belgilangan referent narxlarga qat’iy rioya qilish talab etilmoqda. Agar dorilar cheklangan narxdan yuqori bahoda sotilgani anqalansa, bu litsenziya talablari buzilishi sifatida baholanib, dorixona litsenziyasi bekor qilinishi mumkin.
