Kamilla Rahimova Fransiyaning Anje shahrida o'tgan WTA 125 Open Angers Arena Loire turnirida g'alaba qozonib, O'zbekiston bayrog'i ostidagi ilk sovrinini qo'lga kiritdi.
Rahimova finalga yo'l olish jarayonida musobaqaning ikkinchi raqamli tennischisi — xorvatiyalik Ana Rujichni 4:6, 6:3, 7:5 hisobida mag'lub etdi.
Hal qiluvchi bahsda u germaniyalik Tamara Korpachga qarshi bahs olib bordi. 2 soatu 24 daqiqa davom etgan finalda WTA reytingida 112-o'rinni egallab turgan Rahimova 6:3, 7:6(4) hisobida g'alaba qozondi. Bu natija uning joriy mavsumdagi ilk WTA 125 chempionligi bo'ldi.
Kamilla Rahimova (2001 yil, 28 avgust, Yekaterinburgda tug'ilgan) yaqinda O'zbekiston fuqaroligini olgan edi. Ushbu g'alaba tennischining O'zbekiston sharafini himoya qilgan holda erishgan ilk yirik yutug'i sifatida tarixga kirdi.
