O‘zbekiston Respublikasi Prezidenti Shavkat Mirziyoyev Xitoy Xalq Respublikasi Raisi Si Tszinpinning taklifiga binoan 30 avgust kuni rasmiy tashrif bilan ushbu mamlakatga jo‘nab ketti.
Tashrif dasturiga muvofiq, davlatimiz rahbari 31 avgust - 1 sentyabr kunlari Tyanszin shahrida Shanxay hamkorlik tashkiloti Davlat rahbarlari kengashining navbatdagi majlisi va "ShHT plyus" formatidagi uchrashuvda ishtirok etadi.
ShHT doirasidagi ko‘p qirrali hamkorlikni ustuvor yo‘nalishlarda yanada rivojlantirish va tashkilot faoliyatini takomillashtirishning dolzarb masalalari muhokama qilinadi.
Tyansjin deklaratsiyasi, qo‘shma hujjat va qarorlar qabul qilinishi rejalashtirilgan.
O‘zbekiston yetakchisi 2 sentyabr kuni Pekin shahrida XXR Raisi Si Tszinpin bilan muzokaralar, shuningdek, xorijiy delegatsiyalar rahbarlari va Xitoyning ishbilaromon doiralari vakillari bilan uchrashuvlar o‘tkazadi.
3 sentyabr kuni davlatimiz rahbari Ikkinchi jahon urushidagi G‘alabaning 80 yilligiga bag‘ishlangan tantanali tadbirlarda ishtirok etishi ko‘zda tutilgan.
