SSV Matbuot xizmati maktab o‘quvchilari sog‘lomlashtirish oromgohlariga borishi uchun talab etiladigan tibbiy ma’lumotnomalar haqida ma’lumot berdi.
— Avvalo, ushbu maskanlarga 7-14 yoshli bolalar qamrab olinishini aytish joiz, — deydi Sog‘liqni saqlash vazirligi Bolalikni muhofaza qilish bo‘limi bosh mutaxassisi Nilufar Mansurova. — Ular ketishdan bir necha kun oldin hududiy oilaviy poliklinika yoki oilaviy shifokor punkti yoxud oilaviy poliklinikada shifokor ko‘rigidan o‘tkaziladi hamda shundan keyin bolaning sog‘lig‘i to‘g‘risida 079 shakldagi ma’lumotnoma to‘ldiriladi.
Tibbiy ko‘rik vaqtida bolaning umumiy ahvoli baholanadi. U sog‘lom bo‘lsa, ya’ni oromgohga borishiga to‘sqinlik qiladigan hech qanday monelik aniqlanmasa, ma’lumotnoma rasmiylashtiriladi.
Mazkur hujjatda bolaning ism-sharifi, yoshi, yashash manzili, ota-onasining telefon raqami, ta’lim olayotgan maktabi va sinfi hamda qaysi hududiy poliklinikaga qarashliligi ko‘rsatiladi.
Shuningdek, ma’lumotnomada quyidagilar bo‘lishi kerak:
- sog‘lig‘i to‘g‘risidagi ma’lumot, ya’ni tashxisi (“D” nazoratida turgan bo‘lsa, o‘sha holatdagi tashxisi);
- umumiy allergik holati (biron bir narsaga allergiyasi mavjudligi);
- shu paytga qadar qaysi kasalliklarni o‘tkazgani (qizamiq, ko‘kyo‘tal, tepki, gepatit va hokazo);
- qoqshol hamda qizamiqqa qarshi oxirgi emlangan sanasi;
- jismoniy rivojlanishi va jismoniy guruhi (tavsiya etilgan tartibi ko‘rsatilgan holda).
- Har bir bola hamshira tomonidan pedikulyoz bo‘yicha ham tekshiruvdan o‘tkaziladi.
Sog‘liqni saqlash tizimi raqamlashtirilayotgan hozirgi davrda tibbiy ma’lumotnoma olish hech qanday qiyinchilik tug‘dirmaydi.
SSVning ma’lum qilishicha, bolajonlarimiz oromgohlarda ham tibbiyot xodimlari nazoratida bo‘ladi. Barcha dam olish maskanlarida tibbiy punktlar tashkil etilib, ular malakali shifokor va hamshiralar hamda zarur dori-darmonlar bilan to‘liq ta’minlanadi.
