Normativ-huquqiy hujjatlar loyihasini ishlab chiqish va kelishishning yagona elektron tizimi — project.gov.uz portalida Vazirlar Mahkamasining “Istirohat bog`lari faoliyati va boshqaruv tizimini tubdan takomillashtirish to`g`risida”gi qarori loyihasi joylashtirildi.
Loyihaga ko`ra, Toshkent Botanika bog`i Qoraqalpog`iston Respublikasi Vazirlar Kengashi, viloyatlar va Toshkent shahar hokimligi huzuridagi “Istirohat bog`larini boshqarish direksiyalari” davlat muassasasi balansiga o`tkazilishi belgilangan.
Ushbu loyihaga O`zbekiston Ekologik partiyasi norozilik bildirdi.
Qayd etilishicha, O`zbekiston Respublikasi Botanika instituti huzuridagi akademik F.N. Rusanov nomidagi Toshkent Botanika bog`i noyob ilmiy-unikal ob`ekt hisoblanadi.
"Shu sababli, Botanika bog`ini Vazirlar Mahkamasining “Istirohat bog`lari faoliyati va boshqaruv tizimini tubdan takomillashtirish” to`g`risidagi qarori loyihasidan chiqarish hamda Botanika bog`iga Milliy bog` maqomini berish orqali uning nufuzini va muhofazasini kuchaytirish kerak deb hisoblaymiz.
Mazkur masala bo`yicha partiyamizning Oliy Majlis Qonunchilik palatasidagi fraksiyasi nomidan Hukumatga deputatlik so`rovi yuborildi", - deyiladi partiya xabarida.
