Birlashgan Millatlar Tashkiloti Bosh kotibi Antoniu Guterrish Rossiya tashqi ishlar vaziri Sergey Lavrov bilan uchrashdi.
BMT matbuot xizmati xabariga ko`ra, BMTning Nyu-Yorkdagi qarorgohida bo`lib o`tgan uchrashuvda suhbatdoshlar Ukrainadagi mojaro, shuningdek, Afg`oniston va Suriyadagi vaziyatni muhokama qilgan.
BMT rahbari Istanbuldagi Qo`shma muvofiqlashtiruvchi markaz oxirgi vaqtlarda duch kelayotgan to`siqlar haqida gapirib, bu masalada xavotir olayotganini ta`kidladi.
Bosh kotib Lavrovga Rossiya prezidenti Vladimir Putinga berilishi kerak bo`lgan maktubni topshirdi. Unda BMT rahbari tomonidan tashabbusni takomillashtirish va kengaytirishga qaratilgan, tomonlarning pozisiyalari va global oziq-ovqat xavfsizligiga xavf-xatarlarni hisobga olgan holda taklif qilingan keyingi harakatlar bayon etilgan. Xuddi shunday xatlar shartnomani imzolagan qolgan ikki davlatga ham yo`llangan.
Bosh kotib, shuningdek, Rossiya Federasiyasi va Birlashgan Millatlar Tashkiloti o`rtasida Rossiya oziq-ovqat va o`g`itlarini jahon bozorlarida ilgari surishda ko`maklashish to`g`risidagi anglashuv memorandumini amalga oshirish bo`yicha Rossiya tomonidan bildirilgan xavotirlarni ham e`tiborga oldi.
U bu borada erishilgan yutuqlar haqida batafsil ma`lumot berdi va BMT hal qilinmagan masalalar ustida ishlashni davom ettirish majburiyatini yana bir bor ta`kidladi.
Guterrish, shuningdek, Lavrovga BMT Kotibiyatining Rossiya rasmiylari uchun AQSh vizasi bilan bog`liq muammolarni bartaraf etish borasidagi sa`y-harakatlari haqida ma`lumot berdi.
