Andijon viloyatining Andijon tumani "Qoratut" mahallasida 21 yoshli ayol yuk mashinasi urib ketishi oqibatida vafot etdi. Bu haqda "Millar" ko`rsatuvida ma`lum qilindi.
Ma`lum qilinishicha, hodisa joriy yilning 2 fevral kuni soat 15:30 da sodir bo`lgan. Unda "Qoratut" mahallasi hududida ayol yo`lning belgilanmagan joyidan o`tayotgan vaqtida uni yuk mashinasi urib ketgan.
"Qayrilayotgan vaqtimda ayol kishining baqirgan ovozini eshitib qoldim. To`xtab qarasam shu holat vujudga kelibdi. Darhol uni tez tibbiy yordamga olib bordim", - deydi yuk mashinasi haydovchisi.
Ayol shoshilinch ravishda chap oyoq boldir qismi va bosh suyagining yopiq sinishi tan jarohati bilan shifoxonaga olib borilgan. Biroq ko`rsatilgan yordamga qaramasdan shifoxonada vafot etgan.
Hozirda mazkur holat yuzasidan Andijon tumani Ichki ishlar boshqarmasi Tergov bo`linmasi tomonidan tergovga qadar tekshiruv harakatlari olib borilmoqda.
