Sal avval, ijtimoiy tarmoqlarda odob-axloq qoidalariga zid ravishda tasvirga olingan videosi va suratlarni tarqatgan bloger S.S.ga sud qarori bilan 5 sutka ma`muriy qamoq jazosi tayinlangan edi.
Ayni paytda Toshkent shahar sudi matbuot xizmatining xabar qiligshicha, 15 noyabr kuni Toshkent shahar sudining jinoyat ishlari bo`yicha sudlov hay`ati apellyasiya instansiyasida S. S. ga oid ish yuzasidan chiqarilgan sud qaroriga huquqbuzar tomonidan berilgan apellyasiya shikoyati ko`rib chiqildi.
Ma`muriy javobgarlikka tortilgan S. S. apellyasiya shikoyatida, hozirgi kunda qilgan ishidan pushaymonligi bildirib, sud qarori bilan tayinlangan jazoni engillashtirishni so`ragan.
Apellyasiya instansiyasi sudi shikoyatda keltirilgan vajlarni o`rganib, ma`muriy javobgarlikka tortilgan S. S. ga nisbatan jazo tayinlashda, shaxsini, yoshini, ayolligini, bir nafar voyaga etmagan farzandi borligi va qilmishidan pushaymonligini inobatga olib, birinchi instansiya sudi qarori bilan tayinlangan ma`muriy qamoq jazosini kam muddatdagi ma`muriy qamoq jazosiga keltirishni lozim deb topdi.
Toshkent shahar sudining ajrimi bilan jinoyat ishlari bo`yicha Mirobod tuman sudining S. S. ga oid qarori o`zgartirilib, huquqbuzarga nisbatan insonparvarlik tamoyili qo`llanilgan holda tayinlangan 5 sutka ma`muriy qamoq jazosi 4 sutka ma`muriy qamoq jazosiga keltirildi.
Natijada ma`muriy javobgarlikka tortilgan S.S. jazoni to`liq o`tagan deb hisoblanib, Toshkent shahar IIBB Maxsus qabulxonasidan ozod qilindi.
