Madaniyat vazirligi markaziy apparatida ushbu masalaga oid tanqidiy yig`ilish o`tkazildi. Bu haqda vazirlik rahbari Ozodbek Nazarbekov xabar bermoqda.
"Ijro intizomi nazorati masalasiga oid yig`ilish o`tkazdik",-deydi Nazarbekov.
Shuningdek, ta`kidlanishicha, yig`ilishda joriy yilda ijro intizomini nazorat qilish borasida olib borilgan ishlar tanqidiy-tahliliy sarhisob qilinib, yo`l qo`yilgan kamchiliklar, muammolar, shuningdek, vazirlik tizim tashkilotlarida o`tkazilgan tekshiruv davomida aniqlangan korrupsion holatlarni jiddiy muhokama qilingan.
Uning davomida endilikda o`tkaziladigan tanlovlar hamda madaniy loyihalar nafaqat viloyatlar va chekka tumanlarni qamrab olishi aytiladi.
"Ammo shuni ham ta`kidlash lozimki, tizimda ijro intizomini tartibga solishni qat`iy nazoratga olish kabi masalalar hamon oldimizda ko`ndalang turibdi",-deydi vazir.
"Aytish kerakki, o`tgan besh yillikda berilgan imkoniyatlarning natijasini yaqqolroq namoyon etish, korrupsiyaga to`la barham berish kelgusi faoliyatimizga qo`yilgan asosiy talabdir. Endilikda har bir sohadagi faoliyat va korrupsiya masalasi Davlatimiz rahbarining qattiq nazorati ostiga olindi. Bu esa bizdan yanada ko`proq mas`uliyat va jiddiy e`tibor talab qiladi",-deydi u.
Ma`lum qilinishicha, yig`ilish yakunida 2022-2025 yillarga mo`ljallangan rivojlantirish dasturi hamda O`zbekiston rahbari tomonidan belgilab berilgan sohaga oid ustuvor vazifalar yuzasidan zarur ko`rsatma va topshiriqlar belgilab olindi.
