Буюк Британия ва Исроилда истиқомат қилиб келаётган таниқли ҳайкалтарош Цадок бен Давид Тошкент шаҳрида “Ярим туннинг иккинчи юзи” деб номланган вернисажини намойиш этмоқда. Кеча, 25 март куни Ўзбекистон тасвирий санъат галереясидан ўрин олган мазкур кўргазма лойиҳаси Исроилнинг Ўзбекистондаги элчихонаси кўмагида ташкил этилди. Бу ҳақда Uzbekistan Today ахборот агентли хабар беради.
Ушбу лойиҳа юпқа зангламайдиган пўлатдан ясалган ҳайкалтарошликнинг уч қиррасини ўзида мужассам этган. Таниқли ҳайкалтароши Цадок бен Давиднинг ижодий ишлари ўзига хос бадиий услуби билан ажралиб туради.
Унинг ҳар бир асари ижодкорнинг бадиий тафаккури ва тасаввурини акс эттиради.
Рассом Қуддусдаги Санъат ва дизайн бадиий академиясини ҳамда Лондондаги Марказий санъат ва дизайн коллежини тамомлаган. Айни пайтда у Лонданда яшаб, ижод қилмоқда.
Кўргазма жорий йил 20 майга қадар давом этади.
