Ҳар қандай клубда трансфер сиёсатининг тўғри олиб борилиши - эришилажак муваффақиятларга замин яратади. Бугун сиз билан Мадриднинг “Реал” клубида ўзини оқламаган трансферлар ҳақида маълумот берамиз.
“Қаймоқранглилар” айни пайтда чемпионлар Лигаси ғолиби бўлиб, мамлакат чемпионатида ҳам етакчиликни қўлдан бермай келяпти. Кўриниб турибдики, “қироллик клуби” олдинги йиллардаги хатоларидан тегишли хулоса чиқарган. Лекин, сўнгги ўн йилликда клуб трансфер бозорида кўп бора адашган эди.
Нури Шахин (2011 йили ”Боруссия”дан 12 миллион еврога сотиб олинган)
Турк ярим ҳимоячисининг сотиб олиниши бошиданоқ кўп саволларни келтириб чиқарган эди. Чунки, “Реал” марказида унга жой топилиши мумкинлигини клуб раҳбарлари ўйлаб кўрмадилар. Мутасаддилар Шахиннинг ўша пайтда чемпионликни қўлга киритган “Боруссия” таркибидаги ажойиб ўйинидан таъсирланиб, уни 12 миллион еврога сотиб олади.
Лекин, Нури ўта кучли рақобатга тайёр эмасди. Бундан ташқари, у жароҳат олиб жамоадаги мослашув жараёнини кечиктирди ва охир-оқибат клубга керак бўлмай қолди.
Шахин “Реал” таркибида 4 марта майдонга тушди холос. Сўнг у “Ливерпуль”га ижарага бериб юборилди. “Энфилд”да иши юришмаган Нури Дортмундга қайтиб боргач, Клопп ундан "эски" Шахинни ясаш учун ҳали ҳам ҳалак...
Эмерсон ( 2006 йили “Ювентус”дан 16 миллион еврога сотиб олинган)
Лондоннинг “Челси”сига Клод Макелелени сотиб юборгач, “Реал” хатога йўл қўйганини англаб француз ярим ҳимоячиси ўрнига мос тушадиган ўйинчи излашга тушди. Бир йил давомидаги изланишлар даярли натижа бермади. Бу вазифани “Байер”да номи чиқиб, “Рома”га йўл олган ва “Ювентус” сафида ўзини оқламаётган бразилиялик Эмерсон оқлайди деган фикрга келдилар. Туринликларга "Реал" бонуслар билан қўшиб ҳисоблаганда, 16 миллион евро тўлади. “Реал” Фабио Капелло бошчилигида Испания чемпионатини ютган бўлсада, чемпионлар Лигасидан 1/8 финалда чиқиб кетганлиги сабаб, мураббий истъфога чиқарилди. Эмерсон бўлса, Примерода 28 марта майдонга тушгани билан таркибга қўшилиб кета олмай, танқидлар бўҳронида кезарди. Шундан сўнг уни “Милан”га 5 миллионга сотиб юбордилар.
Вальтер Самуэль (2004 йили “Рома”дан 23 миллионга)
Аргентиналик марказий ҳимоячи “Реал”га 2004 йилнинг ёзида келиб қўшилди. Самуэл “Рома”да кучли мавсум ўтказгани учун бу харидни асосли дейиш мумкин эди. Афсуски, ўша йилги мавсумда “Қироллик клуби”даги мураббийларнинг кетма-кет алмашинуви Италияда “девор” лақабини олган ҳимоячига салбий таъсир ўтказиб, у ўзига ўхшамай қолди.
2005 йилнинг ёзида Самуэль, Солари ва Луиш Фигу “Интер” томонга қараб йўл олдилар. Вальтер учун “Реал” 18 миллион евро ола билди, холос.
Кака ( 2009 йили “Милан”дан 65 миллион еврога)
Рики Кака ўзининг қадрдон клуби “Милан” уни сотиш масаласида “Реал” билан келишганини эшитгач, роса йиғлаган экан. Кўриб турганингиздек, футболчининг ўзи ҳам бу жараённи охири яхшилик билан тугамаслигини сезган. “Реал” ўша йили “Олтин тўп” соҳиби билан биргаликда Криштиану Роналдуни ҳам сотиб олган бўлиб, португалиялик футболчи Кака билан бир позицияда ўйнамасада уни ўз соясида қолдириб кетди. У баъзида жуда яхши ўйин кўрсатар, лекин бу ҳаракатлар “Милан”дагига нисбатан жуда нурсиз эди.
Балки, Какага ўзини бор қудратини намойиш этиш учун узоқ давом этган жароҳатлар халақит бергандир... 2010 йилда Кака саккиз ой ўйнамаслиги аниқ бўлгач кўпчилик унга чизиқ тортиб бўлган эди. Рики майдонга қайтди, лекин жароҳат асоратлари уни таъқиб қиларди. У Мадридда ўтказган тўрт йил давомида жаҳонинг энг зўр ўйинчисидан - ўтган замон феълида эсланадиган футболчига айланди.
2013 йили Кака ўзининг қадрдон “Милан”ига бепул қайтиб, катта футболнн яна забт этмоқчи бўлди, Лекин, бешавқат вақт ўз сўзини айтиб бўлганди....
Манба: sports.uz
