АҚШнинг Коннектикут штатидаги стоматологияда фаолият кўрсатувчи Рашми Патель қотилликда айбланмоқда. У 64 ёшли Жудит Ганнинг 20 та тишини бир вақтнинг ўзида олиб ташлагач, бемор стоматолог креслосида вафот этган. Бу ҳақда Вести.ру хабар беради.
Аслида бу воқеа 2014 йилнинг 17 февраль санасида содир бўлганди, бироқ шу вақтгача давом этган суд ишлари натижасида Рашми Патель айбдор деб топилгани маълум қилинди. Ҳақиқатдан ҳам, беморнинг 20 та тиши бирин-кетин олиб ташланиб, унинг ўрнига сунъий тишлар ўрнатилиши лозим эди.
Бироқ аёл, стоматологнинг барча 20 та тишни бир кунда, бир вақтда олиб ташлашини кутмагани аниқ. Маълум бўлишича, Пателнинг ёрдамчилари аёлнинг тишларини ҳаммасини бир вақтда олишига қарши бўлиб, уни тўхтатишга ҳаракат қилишган. Чунки бир нечта тиши олингач, беморнинг тоби қоча бошлаган. Шундан сўнг, унинг ранги оқариб, хириллаган товуш чиқарган ва хушини йўқотган. Бироқ Патель шунда ҳам ўз ишини давом эттириб, тишларнинг барчасини бир вақтда олиб ташлашга ҳаракат қилган. Пателнинг ёрдамчилари тез ёрдам машинасини чақиришган, бироқ улар етиб келгунга қадар аёлнинг жони узилган. Аниқланишича, аёлнинг саломатлиги жойида бўлмаган, бундан ташқари унинг юраги билан боғлиқ хасталиги ҳам бўлган.
Рашми Патель Нтю-Йорк университетида олимлик даражасини олган ва стомотологик жарроҳлик доктори бўлган. Дастлаб Бронксдаги касалхоналардан бирида ишлаган, кейинчалик эса шахсий стоматологик клиникасини очган.
Рашми Патель устидан аввал ҳам полицияга қатор шикоятлар келиб тушган. 2009 йили беморга бўлган беэътиборлиги туфайли бир аёл жабрланган ва суд томонидан унинг фойдасига 500 минг АҚШ доллари ундирилган.
2013 йилнинг декабрь ойида эса 55 ёшли беморни унинг клиникасидан тез ёрдам машинасида олиб кетишларига тўғри келган. Ўшанда беморнинг нафас олиши қийинлашиб, хушини йўқотганди.
Охирги 2014 йилнинг 17 февралида бемор аёл Жудит Ган битлан бўлиб ўтган ходисадан сўнг, Патель хисбга олинганди, бироқ бир мунча вақтдан сўнг у 25 минг АҚШ доллари миқдоридаги гаров эвазига озодликка чиқди. Шу кунларда у суд олдида ўз қилмиши учун жавоб бериши лозим.
