Сифати кафолатланмаган дори воситаларини яширин йўллар билан мамлакатимизга олиб киришга бўлган уринишлар божхона органлари томонидан ўз вақтида бартараф этилмоқда.
Жумладан, Давлат божхона қўмитаси Контрабанда ва божхона қонунчилиги бузилишига қарши курашиш бошқармаси ходимлари томонидан ўтказилган тезкор тадбир давомида “тропикамид” дори воситаларининг ноқонуний савдосига барҳам берилди. Бу ҳақда Давлат божхона қўмитаси ахборот хизмати хабар бермоқда
Чилонзор тумани Олмазор метро бекати яқинида ўтказилган тезкор тадбир давомида, фуқаролар Б.З. ва Х.Б.лар 1617 дона тропикамид дори воситаларини 55 миллион сўмга шартли харидорга пуллаётган вақтида ашёвий далиллар билан қўлга олинди.
Шунингдек, қонунбузарлардан кўрик давомида тегишли ҳужжатлари бўлмаган умумий қиймати 290 минг сўмлик 193 дона ҳомиладорликни аниқловчи тестлар ва “цитеал” номли дори воситаси ҳам ашёвий далил сифатида олинди.
Яна бир ҳолатда, Қатортол кўчасида ўтказилган тезкор тадбир давомида фуқаро М.А. 1000 дона тропикамид дори воситаларини
32,5 миллион сўмга шартли харидорга ноқонуний тарзда сотаётганида тезкор гуруҳ ходимлари томонидан қўлга олинди.
Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.
