Хитойлик ишлаб чиқарувчилар томонидан автомобилларни ёқилғи билан таъминловчи қурилма ишлаб чиқилди, дея хабар беради Ўзбекистон Республикаси интеллектуал мулк агентлиги расмий сайти.
Бу қурилма нефть маҳсулотлари сақлаш учун мўлжалланган икки деворли идиш, бензин қуйиш колонкасига уланадиган чиқарувчи қувурдан иборат. Идишнинг ички сирти ҳамда унинг деворлари орасидаги бўшлиқ портлашдан ҳимояловчи материаллар билан тўлдирилган.
Ўзбекистон интеллектуал мулк агентлигида хабар берилишича, ёқилғи учун идиш ва қуйиш колонкаси зарбаларга қарши асосга маҳкамланган ва усти қоплама билан қопланган ҳаракатланувчи платформага ўрнатилган.
Ёқилғи қуйиш колонкаси рақамли электрон дисплей, бензонасос ва ёқилғи қуйиш пистолетини ишга туширувчи алоҳида блок кўринишида ишланган. Рақамли электрон дисплей ва ёқилғи қуйиш пистолети ҳаракатланувчи платформа қопламасининг ташқи деворига маҳкамланган. Бу ихтирога IAP 04967 рақамли патент берилган.
