Навоийлик аёл одамларнинг ишончини суиистеъмол қилиб, фирибгарлик билан пул топишдек жиноят турини ўзига "касб" қилиб олиб, муқаддам 6 марта жазога тортилса-да, "тавба" қилмади, деб ёзмоқда uz24.uz "Ҳуқуқ" газетасига таяниб.
4 нафар фарзанднинг онаси Раъно Ишанқулова бир соддадил аёлнинг ишонувчанлигидан фойдаланиб, Кармана туманида Кумушкон қўрғонидаги ер участкаларидан бирини 3 млн. сўмга олиб беришини, пулнинг ўрнига тиллалар ёки кийим-кечаклар билан ҳисоб-китоб қилиши мумкинлигини айтади.
Ернинг дарагини эшитган дугонаси қувонганидан тилла тақинчоқларини Раъно Ишанқуловага қўшқўллаб "ҳадя" қилиб юборди. Шу усулда дугонасининг 7 миллион 865 минг сўмлик кийим-бош ва тилла тақинчоқларини қўлга киритади.
Бундан ташқари, фирибгар аёл тилла тақинчоқларни қимматроққа сотиб бериш "хизмати"ни ҳам амалга ошириб келганлиги аниқланди. У шу йўл билан икки нафар танишининг 43 миллион 120 минг сўмлик ва 9 миллион 800 минг сўмлик тилла тақинчоқларини қўлга киритди. Алдов йўли билан қўлга киритилган қимматбаҳо тақинчоқларни сотиб юбориб, пулларини бемалол шахсий эҳтиёжлари учун ишлатди.
Р. Ишанқулова фирибгарлик қилмишлари учун яна бир карра суднинг қора курсисидан жой олди. Жиноят ишлари бўйича Навоий шаҳар суди томонидан Раъно Ишанқуловага тегишли жазо тайинланди.
