Глобал тадбиркорлик ҳафталиги (GEW) – дунёдаги тадбиркорлар учун янги ғояларга туртки берувчи муҳим воқеликдир. Ҳафталик Ўзбекистон ёшлар иттифоқи, Халқаро бизнес ва технологиялар ассоциацияси, Ўзбекистон Савдо-саноат палатаси ва бошқа ташкилотлар билан ҳамкорликда ташкил этилди.
18 ноябрга қадар давом этувчи мазкур ҳафталикда машғулотлар, тақдимотлар, маҳорат сабоқлари, турли муҳокамалар, онлайн мулоқотлар, b2b форматдаги учрашувлар, теле-мулоқотлар бўлиб ўтади, ёзмоқда ЎзА.
Тадбирда юртимизнинг муваффақиятли тадбиркорлари билан бирга хорижий ишбилармонлар, бизнес ва экотизим соҳасидаги мутахассислар иштирок этиши кутилмоқда.
Глобал тадбиркорлик ҳафталиги стартаплар, таълим ва карьера, молия, хотин-қизлар тадбиркорлиги, бизнесда муваффақият, сайёҳлик, ахборот ва коммуникация технологиялари каби соҳаларни қамраб олади.
Ҳафталикнинг ҳар бир куни бизнес учрашувлар, экотизимни ривожлантириш, тадбиркорлик, инвестициялар ва Тошкентда бизнес, инновациялар ва стартаплар, бизнеснинг ижтимоий масъулияти, маданият ва Ўзбекистон ҳудудлари билан танишув каби мавзуларга бағишланади.
Ҳафталик давомида “Бизнес ва давлатнинг ўзаро мулоқоти“, “Business Womenʼs Gap“, “Тадбиркорлик экотизими“, “Экотизим бўйича хориждаги тажриба“, “Тошкент – келажак шаҳри“, “Таълим – миллатнинг тараққиёт мезони сифатида“, “Блокчейн“, “Маркетинг“, “Альтернатус“ майдончаси, “Туризм“, “Стартаплар“, “Кўчат ўтқаз!“ каби мавзуларда тадбирлар, мулоқотлар ўтказилиши кўзда тутилган. Шунингдек, Бухоро, Самарқанд, Қарши шаҳарларида моҳир бизнесменлар иштирокида маҳорат дарслари ташкил этиш режалаштирилган.
