Австралия полицияси қулупнай меваси ичига игна тиқиб қўяётган шахсни аниқлади, деб хабар берди РИА новости нашри.
У 15 ёшли ўспирин бўлиб, бу ишни шунчаки “ҳазил тариқасида” амалга оширган. Аввалроқ Австралия дўконларида сотилаётган қулупнай ичидан игналар чиқаётгани маълум қилинганди. Reuters ахборот агентлигининг хабар беришича, тергов давом этади ва ҳуқуқ-тартибот идоралари қолган гумонланувчиларни ҳам излаб топади.
Австралия бош вазири Скотт Моррисон мевалар ичига игна тиқиб қўяётган жиноятчилар учун жазони 15 йилгача озодликдан маҳрум қилишгача қатъийлаштиришни таклиф қилган. “Бу асло ҳазил, ҳатто кулгили ҳам эмас. Бу барча австралияликлар ҳаётини хавф остида қолдиришдир.Жазо ҳам шунга яраша бўлиши лозим” деди Скот Моррисон.
