Март ойида таҳминан Ҳинд океани майдонига қулаган Malaysia Airlines авиакомпаниясининг Boeing 777 лайнери қидирув ишлари сентябрь ойи охирларида давом эттирилади. Бу ҳақда Ассошиэйтед Пресс агентлиги хабар беради.
Австралия транспорт хавфсизлиги бюроси бошлиғи Мартин Доланнинг маълум қилишча, 30 сентябрь куни таҳминан самолёт қулаган ҳудудга учта кема юборилади. Шунингдек, қидирув ҳудудини жануб томонга суриш режалаштирилмоқда.
Эслатиб ўтамиз, 24 март куни Малайзия бош вазири ва Malaysia Airlines авиакомпанияси самолёт ҳалокатга учрагани ва унинг бортидаги барча йўловчилар ва экипаж аъзолари ҳалок бўлганини маълум қилган эди.
Малайзия авиакомпаниясига қарашли бўлган самолёт 8 март куни парвозга чиққанидан икки соат ўтгач, сирли тарзда ғойиб бўлган. Лайнер бортида 227 нафар йўловчи ҳамда 12 экипаж аъзоси бўлган.
