Ёзнинг жазирамасида АҚШдаги соҳилда хордиқ чиқариб қайтган 41 ёшли Эрин Кароццо олмос кўзли узугини пляжда тушириб қолдиргани ҳақида Facebook'даги саҳифасида “узук бирор хазина изловчининг чўнтагига тушиб қолган бўлса керак...” дея ёзиб қолдирди. Гарчи воқеага салкам бир ой бўлган бўлса-да, унинг узуги топилди ва эгасига қайтарилди. Бу ҳақда www.glunews.ru нашри хабар беради.
Айтиш лозимки, Эрин қайсидир маънода хақ эди. Facebook'даги “мурожаат”дан сўнг икки кун ўтиб, олмос кўзли узукни хоббиси хазина излаш бўлган 68 ёшли Майк Коган топиб олади. У ҳам ўз ўрнида “топилма”нинг суратларини Facebook'ка жойлашди. Facebookда Эриннинг олмос кўзли узугини кўрганлар Эринга бу ҳақда хабар беришди. Эрин шу захотиёқ Майк билан боғланиб, йўқолган узуги ҳақида айтади. Бир неча кун ўтиб эса улар учрашишди ва Майк аёлга йўқотган олмос кўзли узукни қайтариб берди. “Мен дунёда шундай яхши инсонлар борлигидан хурсандман. Чунки ҳаммаси бошқача бўлиши ва узук ҳеч қачон топилмаслиги ҳам мумкин эди” дейди бахтиёр Эрин Кароццо.
