23 ва 27 апрель кунлари Тошкент шаҳрида автобус йўналишларини янада мақбуллаштириш, ҳаракатланадиган таркибнинг рационал миқдорини аниқлаш мақсадида транспортнинг барча турларида йўловчилар оқими комплекс ўрганиб чиқилади, бу ҳақда Тошкент шаҳар ҳокимлиги ахборот хизмати хабар беради.
Тошкент шаҳар ҳокимлиги, Ўзбекистон автомобиль ва дарё транспорти агентлиги, “Тошшаҳартрансхизмат” акциядорлик компанияси, шаҳар ҳокимлигининг йўловчи транспортининг барча турлари ҳаракатини лицензиялаш ва мувофиқлаштириш департаменти ҳамкорлигида ўтказилаётган мазкур жараёнда олий ўқув юртлари талаба ва ходимлари яқиндан ёрдам берадилар. Хусусан Тошкент автомобиль йўллари институти ҳамда Турин политехника университетидан 11 мингга яқин талаба ҳисобчи сифатида жалб этилиб, улар йўловчилар транспортга чиққанда бекатнинг рақами кўрсатилган талонни берадилар ва йўловчи манзилига етиб олганда талонни қайтариб олиб, бекат рақамини ёзадилар. Мазкур талонлар транспорт сўнгги бекатга келганда таълим даргоҳларидан йўналишларга бириктирилган масъул ходимлар ёрдамида йўналишнинг бошланган ва тугалланган вақти кўрсатилган махсус идишларга солиниб, ушбу маълумотлар атрофлича ўрганиб чиқилади. Бу эса ўз навбатида “Тошшаҳартрансхизмат” акциядорлик компаниясига йўналишда йўловчилар оқимига қараб куннинг турли пайтларида катта ёки ўрта сиғимдаги транспортдан фойдаланиш, баъзи йўналишларга ўзгартириш киритиш каби аҳолига фойдали хулосалар чиқаришга ва амалда қўллашга хизмат қилади.
Хабарингиз бор, 2013 йил 9 октябрида Ўзбекистон Республикаси Президентининг “Тошкент шаҳрида йўловчи ташиш трнаспортини ташкил этиш тизимини янада такомиллаштириш чора-тадбирлари тўғрисида”ги қарори қабул қилинган эди. Унинг ижросини таъминлаш юзасидан эса Вазирлар Маҳкамасининг “Шаҳар йўловчи ташиш транспорти тизимини янада такомиллаштиришга доир ташкилий чора-тадбирлар тўғрисида”ги қарори тасдиқланиб, унда қатор лойиҳалар амалга оширилиши белгилаб қўйилди. Ўтган йилнинг декабрь ойидан бошлаб жамоат транспорти ҳаракатини мониторинг қилувчи GPS тизими пойтахтдаги 8 та автобус йўналишига татбиқ қилингани соҳадаги ижобий ўзгаришларнинг дебочасидир. Қарорда белгиланишича, жорий йилнинг якунига қадар GPS-ускуналари Тошкент шаҳридаги барча жамоат автобусларига ўрнатилади.
Тошкент шаҳар ҳокимлиги пойтахтимизда кўрсатилаётган транспорт хизматлари самарадорлигини янада оширишга қаратилган мазкур тадбирга эътиборсиз бўлмаслик, манзилларга етиб олиш жараёнининг янги сифат босқичига кўтарилишига барчани ҳисса қўшишга чақирди.
